「福射大狀」勁旺！歐陽震華帶挈拍檔嫁得好

都話靚仔唔系大曬！無綫最近深宵重播廿年前嘅《壹號皇庭》系列掀起煲劇潮，我Nuts哥真心覺得歐陽震華（Bobby）好揪得，全劇得番佢依然穩守喺無綫兼仲要系一哥！咪睇佢其貌不揚、頭髮少少兼肥嘟嘟，憑過人實力同福氣，由當年喺《皇庭》嘅「余在春」撈到依家《誇世代》「Skin head」宋仲基，問你服未！佢領軍帶住全台花旦小生拍台慶劇《誇世代》，無論同80後、90後都全冇代溝，與時並進嘅佢仲識得玩潮語，幫同劇兼細佢足足三十年嘅吳業坤改名叫「Seven」，唔怪得坤坤都封佢做偶像啦！

賭王孫女粉絲變老婆

近排王祖藍首洗腦歌《咖喱魚蛋》個個狂Loop，Bobby都唔輸蝕，呢排喺廣告度唱爆「鮑魚」！其實早喺上年無綫劇集《一屋老友記》度，已經有人留意到佢同其他主角喺屋企打邊爐嘅戲，出動咗鮑魚、虎蝦、桶蚝等真富貴食材！相反，同劇嘅臨時演員只可以「聞」道具面嚟扮食。茄喱啡Bobby都做過，佢仲自爆當年喺藝訓班系最醜樣，因為有學員唔撈， 佢先至有機會簽無綫， 佢話：「不知演過幾多『老笠』，試過笠絲襪『打劫』金行，衝出嚟遇到真警察，佢哋準備掹槍！呢啲演出全部都系預我，冇嘅，我做得好、逼真嘛！」唔只識得苦中作樂，Bobby仲好似佢喺鮑魚廣告話齋： 「有Heart、有Substance ！」有料到使乜驚！

想食鮑魚多過想啃道具面嘅Bobby終於傻人有傻福，被以「高大靚仔」嚟形容佢嘅監製鄧特希揀中拍《皇庭》，紮上一線小生，仲同陶大宇、蘇永康同駱應鈞成為《皇庭》四虎， Bobby更加長做長有，成為收視同吸金保證！身為元祖級師奶殺手嘅佢仲「福射」旺埋「另一半」，Part過嘅花旦關詠荷、蔡少芬等都有幸福歸宿，唔怪得Bobby得戚話：「同我合作過嘅都嫁得好！」

《皇庭》劇唔止令Bobby名利雙收，仲帶嚟一段美好姻緣！佢老婆即系賭王傅老榕孫女傅潔嫻，就系「余在春」嘅粉絲，都話男人有才華，條路就易行，因緣際會雙方一見鍾情，所謂難得有情人，搵到個互相欣賞嘅伴侶，呢份福氣真系幾生修到！

「有啱先搵你」唔嬲就假

Bobby福氣仲大到一個點，試過食麻辣火鍋，飽到胃酸倒流，入咗氣管，差啲做植物人，好在及時送入ICU，逢凶化吉！試問咁旺嘅福將，你唔出動八人大轎請佢返嚟旺嚇自己，都已經笨，邊有人仲會主動趕走財神？就系有！早兩年有人同Bobby傾續約，爆咗句「有啱先搵你」，系難怪Bobby嬲嘅！你估家陣人哋冇錢開飯咩，一年拍一個劇，純粹系忠心Bobby嘅TVB情意結咋！Bobby有花名你叫──「貨櫃」！ 笑料裝滿成個貨櫃，夠你拍十齣台慶劇有餘！

或者Bobby都系時候加多個花名叫「茶漬」， 因為呢個世界真系有人寶就當草，竟然會走去颳走紫砂茶壺嗰浸茶漬，就系咁樣一刮，唔識貨嘅人系永遠唔知自己倒咗幾多貨櫃嘅錢出街！

註：文章來自《東網巨星｜on.cc東網》

喜歡這篇文章嗎？立刻分享出去讓更多人知道吧！

本站內容充實豐富，博大精深，小編精選每日熱門資訊，隨時更新，點擊「搶先收到最新資訊」瀏覽吧！

請您繼續閱讀更多來自 港劇資訊 的精彩文章: