黃宗澤奉旨同日模女友親熱新城嫂方媛肚凸凸唔通有咗

娛樂 02-12

每日歌曲

王嘉怡《獵》

今日快報

新城嫂方媛肚凸凸　唔通有咗？

郭富城的女友方媛在微博上載一批靚相，卻意外爆出「喜」事！相中身穿黑色連身傘裙的方媛，腳踏高踭鞋孭住銀色閃令手袋，留言：「慢慢的復活了，假期後開工的第三天，望新的一年繼續努力加油，變成更好的自己，有沒有發現我有一點小變化呢？」

正因方媛自爆有「小變化」，有網民即覺得她其中一幅相小腹微微隆起，疑似有孕，也有粉絲聲稱在其中一張相的玻璃倒影，見到一隻男人手，懷疑是城城偷拍女友。不過，對方媛疑似有喜，城城仍未有回覆。據知，城城正忙於在內地拍攝電影，同時接拍了多部電影，日前他談到女友時，被問到太忙可有遭女友投訴他少見面，城城即說感謝女友對他體諒及包容，當追問他何時成家立室？他笑曬口並眼眨眨，十分風騷。

千嬅做嘉賓　林奕匡開騷唱歌冧女友

歌手林奕匡（Phil）個唱請來人妻兼人母楊千嬅做嘉賓，兩人合唱《再見二丁目》及《斗零踭》，原本Phil吹色士風伴奏，但因色士風不慎跌壞，搞到只能吹了半分鐘就叫停，Phil感謝千嬅說：「冇諗過會一口應承，一星期前都冇呢個單位。」千嬅笑說：「你公司想畀個驚喜你。」隨即互笠高帽，Phil自爆在頒獎禮上獲對方鼓勵，千嬅大讚對方有才華，大家應互相鼓勵及支持，她說：「好佩服你哋個信念同把火，令我唔可以咁懶惰。」

Phil更以歌曲《難得一遇》冧台下未婚妻，他說：「寫呢首歌系寫畀一個人，呢個人陪伴我好多，唔只一個朋友、支持者，佢系我非常愛嘅人。」大銀幕即拍攝台下女友，當唱到最後兩句，Phil刻意企在女友前伸手示意唱給對方聽，凼得女友實時做出心形手勢回禮，期間又感激許志安聽其歌曲，Phil笑說：「如果唔系佢，可能我已經返咗加拿大，亦都多謝背後支持我嘅人、好朋友。」

當提到去年過身的經理人時，Phil一度嗚咽說：「去年佢過咗身，今日佢家人嚟咗，好多謝佢。」之後唱到《大好人》時，Phil大讚哥哥說：「好多人話我系Goodman，我心中有個人畀我更好，乜都叻過我，系我嘅榜樣，令我有目標去追，佢系我哥哥。」個唱全晚僅唱廿七首歌。

孕味濃！諸葛紫岐專攻B女衫

最近社交圈傳出諸葛紫岐（Marie)懷有身孕，但未足三個月，

為怕BB小器，所以不敢張揚

，而Marie因曾經小產過，所以薛嘉麟今次倍加照顧，常寸步不離陪太太，Marie懷孕薛嘉麟最為開心，二人已急不及待掃BB用品。

日前見薛嘉麟與Marie於銅鑼灣一餐廳食晏，一向貪靚的Marie打扮得十分撲素，穿上闊身衫加平低鞋，戴上黑超，由老公拖實步出餐廳，二人行得十分緩慢，期間有幾級樓梯，薛嘉麟即顯得十分緊張，一隻手攬住Marie纖腰，另一隻手拖住，驚老婆叉錯腳。之後兩人朝向專賣小朋友用品樓層進發，十分純熟地步入賣初生用品的店鋪，兩人一邊睇一邊傾，見他們主力睇粉紅色系列，Marie睇中不少BB衫，隨即交畀老公，逗留不足十分鐘已有收穫，薛嘉麟即攞去埋單。

之後又再入另一店鋪，今次則主攻公主裙，兩人見到得意的公主裙都笑曬口，愛不釋手，特別薛嘉麟睇完一件又一件，Marie睇咗一陣似有點疲態，見店鋪有張沙發，隨即坐下休息等老公。之後二人經過其他店鋪有BB床及BB車，都停下來望，不時指著商討一番。二人今次雖主攻初生BB用品，但亦不忘買禮物凼仔仔，他們行經玩具店，立即又入去「掃貨」，之後買了益智的砌圖及幾本書送畀仔仔，然後施施然離開，薛嘉麟全程對Marie照顧周到，攬到實一實，傾偈時又不時情深款款望住老婆，Sweet到爆。

豪宅意外曝光？陳奕迅搞笑fb直播六合彩

昨晚第16期六合彩頭獎多達1,300萬，向來搞怪嘅歌手陳奕迅（Eason）突然好有閒情逸緻喺Facebook直播全程，一開始Eason就影住個大電視機，見佢連頭都冇gel，似系喺屋企，佢仲擺出緊張表情，當攪緊珠嘅時候，佢又好抵死咁轉動鏡頭又chok聲做旁白！

期間仲唔小心影到張梳化，Eason即刻好緊張較番好個鏡頭！當結果出咗嚟之後，Eason就笑笑口對鏡頭講「希望各位同事你哋有中獎」，佢亦有留言話：「Attention to UMG HK colleagues!!!」唔知Eason本身有冇買呢期呢？最後佢又再影到張大梳化，配合埋昏暗嘅燈光，如果真系Eason大宅嘅話，大電視再配大梳化，睇六合彩又真系一流嘅！

愛貓逝世　胡杏兒發文悼念

圈中有唔少藝人系愛貓之人，而其中一位出名系「貓奴」嘅胡杏兒，啱啱喺社交網站透露陪伴咗杏兒同家人20年嘅愛貓「黃黃」剛逝世，上載咗多張黃黃生前嘅靚相悼念愛貓，並發文懷念第一次遇見黃黃，佢話：「記得在我16，17歲時，發現你自己一隻貓在坐電梯，當時心想，為什（甚）么會有人遺棄一隻這麼漂亮的貓貓，於是把你抱回家希望有人會貼告示找你，但到最後一直沒有音訊，而你，就這樣在我們家過了20個年頭。」

杏兒仲話黃黃同其他愛貓相處融洽，佢哋仲當黃黃系大哥一樣尊敬：「黃黃一直是那種與世無爭，性格溫和的貓貓，從來不會和其他貓貓打架，而家裡的貓貓也好像把他當著大阿哥一樣看待，從來不會欺負他。雖然他臉上一直都是很憤怒的表情，但其實黃黃心底里是一隻傻傻的，很溫馴的貓貓。多謝你陪伴了我們這麼長的時間，希望你一路好走，不用再痛苦，到了彩虹橋那邊記得找虎虎，來生我們再見！」

黃宗澤奉旨同日模女友親熱

在《幕後玩家》中飾演公關才子的黃宗澤（Bosco），近來中港兩邊走拍劇搵真銀，雖然Bosco忙到爆但依然精神飽滿，仲操到一身肌肉現身香港，全因再度與美容及健康品牌合作，拍攝新一輯產品廣告。今次廣告的女主角是Bosco的女友Jun，二人「郎才女貌」十分相襯。廣告當中有大量親密鏡頭，但對於兩位合作多年的拍檔而言當然應付自如！