天籟！林憶蓮《歌手》翻唱王菲經典廣東歌！造人成功？楊冪現身母嬰保健院！

娛樂 03-23

今日快報

造人成功？楊冪現身母嬰保健院

大陸女星楊冪與劉愷威2014年結婚後，就誕下女兒小糯米，6月小糯米就3歲喇，好多粉絲都關心楊冪會唔會追多個等小糯米有個伴呢？今日就有網友影到楊冪現身南京某母嬰保健院，照片所見楊冪戴上口罩及戴帽，全身包到冚，打扮非常隱蔽。該網友就表示，為甚麼要去新生兒病區呢？是要給小糯米添個弟弟或妹妹嗎？

但其實楊冪與劉愷威兩人工作都非常忙碌，長期分隔兩地，如果咁樣都造人成功，就真系勁喇，不過早前網上曝光了楊冪的替身，同真人有成9.9成似，會唔會其實系替身嚟咋？

婚期未落實　王君馨全心工作做唔停

藝人王君馨（Grace）日前出發沙巴為美酒品牌的周年晚會擔任表演嘉賓，她到埗後先於酒店露台對住無敵大海景拍片練歌，其後又盛裝打扮於晚會上獻唱曬歌喉。問到她今次酬勞是否滿意？Grace直言喜獲「開心價」：「酬勞ok滿意，我唱咗5首歌，系開心嘅價錢。我事前唔知有間靚酒店住，如果一早知，我就唔介意留多幾日。」

她於活動後又與大班同事品嘗當地美食：「做完嘢有同事帶我哋去食當地好出名嘅海鮮同燒雞翼，好好食！」Grace與男友訂婚後一直未定婚期，她笑言近日先全心投入工作：「今日唱完聽朝就走，我之後要去澳門唱歌，幾日後再拍廣告。」

【方媛接旨】郭富城自爆Plan緊開枝散葉

天王郭富城（Aaron）一向熱愛賽車，今日城城創立「富盛車隊」出戰FRD LMP3（原型車）「極級先鋒系列賽」，並羅致法籍賽車手Olivier Lombard任首席車手，近日齊齊現身珠海國際賽車場出席車隊成立發布會，為出賽的LMP3戰車主持揭募儀式。

榮升車隊老闆的城城西裝畢挺打扮，未有以戰車造型出現，問到有份投資車隊？城城表示：「有投資！（投資幾多？）投資曬落去喇！組車隊系自己夢想，自己都一直想實現，亦會選拔新嘅車手。（要有咩條件，好似你咁靚仔？）今次Olivier系法國人好浪漫，吸引唔少女車迷，佢又靚仔又有潛質，揸車又快。」何時親自落場？城城謂：「遷就到檔期都會，但會以工作行先，不過我又系車隊老闆，精神、力量都會賦予畀車隊，我自己都想落場，作為車隊老闆可以提升技術，參與埋一份都算系賺咗。」

親自試過LMP3戰車未？城城謂：「至今都未有機會試，首場賽事5月中舉行，希望5月初試到車。」藝人林志穎（小志）都有車隊落場比試？城城坦言很期待，之前拍內地真人騷節目《我們十七歲》成為好朋友，坦言：「我嘅技術唔夠小志好，都要向佢請教，相信同場都會有較量，但自己技術冇佢咁好，會傳短訊畀佢叫佢揸慢啲先。」至於車隊命名為「富盛」是否意味想開枝散葉？城城哈哈大笑：「其實個『盛』字系當年爸爸金鋪其中一個字，想記念爸爸，有傳承之意，去培育新一代車手，咁開枝散葉都系好重要，都有少少Plan嘅。」問到《風雲5D音樂劇》日前各演員的造型曝光，城城可留意鄭嘉穎的步驚雲造型？城城笑問：「乜步驚雲有好多個造型咩？我未睇呀，不過，天華同譚耀文都系好朋友，祝佢哋舞台劇成功。」

陳浩民等無線召喚回巢拍劇

藝人陳浩民與太太蔣麗莎一家人出席電影舞蹈工作坊表演暨《美女與野獸》電影觀賞會。談到張衛健返無線拍劇，問到他何時回巢？浩民坦言：「我一直都話返去，佢哋有搵過我，只系時間夾唔到，我隨時等佢哋召喚。」對於是日活動，浩民表示以家長身份出席，更指沒有收取酬勞，更謂：「難得畀機會個女上台表演，仲收人錢？多謝都喛唔切啦！」

對於該片被指有同性戀情節，有學校更發信給家長要求罷睇該片，浩民表示沒有收到，他謂：「我哋都睇咗套戲，可能我鑒賞力低，睇唔到暗示嘅情節。（會唔會教小朋友兩性關係？）依家未到時候，遲啲先，不過如果知套戲有呢方面情節就唔會畀小朋友睇，唔緊要啦！佢哋都瞓咗半場，可能跳過咗啲暗示，喺一個好舒服環境瞓覺，我就好開心第一次唔使拖佢哋離場。（點解咁抗拒畀佢哋睇有關同性戀戲？）多一事不如少一事，免得麻煩。」

天籟！林憶蓮《歌手》翻唱王菲經典廣東歌

最新播出一集內地歌唱節目《歌手》，觀眾嘅焦點又落喺天后林憶蓮身上，原因系憶蓮喺節目上，首次演唱廣東歌，仲要系另一天後王菲嘅經典歌《多得他》，片段上載咗去《歌手》嘅官方Facebook，只系15個鐘已經有超過三十萬點擊率，仲未計其他渠道收睇嘅人數，數字十分驚人。

片段中憶蓮以天籟之聲，唱出全新版本嘅《多得他》，為佢伴奏嘅人都非常不得了，除咗憶蓮好友倫永亮彈鋼琴之外，仲有男友恭碩良為佢打鼓，整個演出非常完美無瑕，聽到現場觀眾如痴如醉，就連同場參與嘅歌手彭佳慧都感動落淚。網民睇完片段後都紛紛留言力贊憶蓮嘅超水準表現系「殿堂級的歌聲！」、「我心中最愛的粵語歌之一，終於等到我最愛的女歌神重新演繹，用經典再創經典，只有林憶蓮」。亦有網民大食花生，以兩位天后嘅表現做大對決，不過部分網民就唔多同意用兩位天后嚟比較，其實憶蓮同王菲一早喺1994年合唱過同一首歌，咁多版本大家又鍾意邊個版本多啲呢？

袁偉豪孖煙囪曬肌　宣萱煞科有花收