B女靚樣曝光！張繼聰慈父樣出曬嚟方力申掟煲一年暗寸鄧麗欣難服侍

娛樂 03-25

今日快報

B女靚樣曝光！張繼聰慈父樣出曬嚟

現年40歲的謝安琪（Kay）再度榮升媽咪，昨日入院剖腹誕B女囡囡張靖，恨女恨到發燒嘅張繼聰開心到不得了，啱啱喺社交網曬B女Karina靚樣，佢留言：「感謝大家嘅祝福，Karina says hi to everyone。」見阿聰抱住B女，成個慈父樣出曬嚟呀！

收到大家滿滿的愛及恭賀，謝安琪留言謂：「感謝家人和醫護人員對我的細心呵護，彷彿連我也變成一個小寶寶，真的很溫暖很窩心，所以大家請放心，我一定會復原得很好的。」她亦代囡囡張靖多謝大家的關心及祝福，指女兒很乖，以心型豬嘴向大家說聲Hi咁話喎！

展鵬傳撻單文柔　胡蓓蔚唔安慰胡定欣

藝人胡蓓蔚出席品牌活動，提到陳展鵬與單文柔傳出緋聞，問到有否安慰好姊妹胡定欣？她表示剛從上海回港：「唔需要。（有冇通電話？）我哋每日都WhatsApp 。（點解呢個唔使慰問？）佢哋都話系螢幕情侶，冇話過一齊。（玩地下情？）咁我要問嚇先，定欣冇講過，咁friend冇同我講即系冇呢件事。（唔穩定所以唔講？）冇開始點穩定。」問到會否介紹男仔給定欣？她直言每晚睡不著都會掃電話薄，但仍未找到。她更笑言與老公要再發掘有潛質的男仔。問到是否要篩選？她表示最重要是溝通及了解。

提到老公單立文曾說過「展定戀」是姣婆遇著脂粉客，她解釋：「我老公講嘢都好信？亂噏。（被講到男方一腳踏兩船，定欣會唔會唔開心？）展鵬同埋定欣都冇話過開始，展鵬同我哋好朋友唔會同我哋講大話。（但佢同記者講大話？攬腰？）點解你哋唔選擇去信人，我老公都攬我啲朋友。（知唔知展鵬拍拖？）唔知。（如果你老公車你唔識嘅女仔上山頂？）太迂迴，佢揸車返將軍澳。（老公未有時間偷情？）so far未。（教展鵬唔好上山頂？）人哋去山頂睇風景。（佢哋上山頂食外賣？）外賣好餐廳多人等位，大家以祝福嘅態度開心好多，男未婚女未嫁。」

阿嬌介入人哋感情？阿Sa撐：行得正企正

藝人蔡卓妍（阿Sa）晚上出席公開活動，穿上皮褸亮相嘅佢輕輕露肩，甚有韻味。阿Sa笑言露少少就可以，要適可而止，笑言：「自我感覺良好就得啦。」問到佢依家感情狀況，系咪有人追求緊？佢就話：「不嬲都有架啦，咪睇少我。（未揀啱？）唔答呢啲，之前古天樂教我唔好回應咁多感情事。」

問到好姊妹鍾欣潼（阿嬌）同內地富二代秦奮傳出緋聞，蔡卓妍就話：「朋友嚟嘅，佢之前都有嚟睇我演唱會，佢哋唔系拍拖。（阿嬌被指介入人哋感情？）唔需要回應，多枝折生。行得正企正。」問到阿嬌有冇向佢訴苦？阿Sa就話：「嚇？大家做咗十幾年呢啲濕濕碎，人哋講咩由佢，人生唔系睇呢啲人臉色，要享受人生。」對於有指秦奮嘅女友亦有喺社交網亦有表態，阿Sa就耍手表示唔知道。再追問阿嬌依家有冇拍拖？阿Sa就話：「唔回應，結婚嗰時你哋咪知啰。（咁遲先知）啋，咁樣咒我哋！」

鄭少秋汪明荃趙雅芝重現《倚天》經典

藝人鄭少秋錄像無線特備節目《群星唱談鄭少秋》，獲70年代「三大花旦」汪明荃、趙雅芝、黃淑儀撐場，鄭少秋更搞笑大叫：「好多靚女呀！」鄭少秋、汪明荃及趙雅芝更齊齊影合照，重現《倚天屠龍記》的經典組合，鄭少秋笑謂：「大家快啲影，呢張合照唔知幾時再有機會影，期待下個50年，正呀！」

鄭少秋表示今次嘉賓是主動來撐場，故令他欠下一身人情債，又笑指：「冇靚女我唔嚟?，唔制?，哈哈！」至於可會擔心嘉賓爆他料？他笑謂節目叫《唱彈鄭少秋》，當中一定有「彈」的部分！至於演唱會，他表示定會載歌載舞，更即席表演一小段經典洗腦歌《香港料理》，又答應在個唱中再唱，被問會否「扮嘢秋」上身？他謂造型百變。

談到囡囡鄭欣宜未能做嘉賓，他說:「可惜啦，無辦法佢有工作在身！」至於「蟹仔」陶大宇自薦被他掟落台，他即搞笑說：「咁就要搭高個台嚟掟！」節目錄像時，汪明荃謙稱黃淑儀才是鄭少秋在無線里的第一個夫人，她笑謂：「因為我後生啲，仲未出現。」黃淑儀就謂從未見過一個男人似鄭少秋那麼貪靚，鄭少秋即駁嘴：「最慘系我扮得靚！Gigi嗰陣已經系阿姐級，可以同佢合作，我一定應承！」及後鄭少秋與趙雅芝獻唱時，他更大讚女方雙眼迷人，當年少點定力也會忘記對白。

方力申掟煲一年暗寸鄧麗欣難服侍

分手要狠，Nuts哥真系要問嚇方力申同鄧麗欣（Stephy），拍拖十年話分就分，咁放得低，唔系好多人做到?。兩個人好日唔見面，之前咁啱孖住見人，撞正分手一周年紀念，一樣交唔到戲，完全真情流露零交流，成365日都沖淡唔到，分手原因可想而知有幾僵。

近日輪到方力申單拖出席慈善活動，唔知系咪冇Stephy企喺隔籬眼超超，講嘢都零舍到位，佢話早排去山區探訪完，當地水都冇，水就好似鑽石咁，搞到佢返香港後浸浴變花灑沖涼五分鐘搞掂，仲話做人最緊要識知足。唔知系咪分手期已過，佢講嘢冇話就住就住，形容自己改變唔少，以前對工作有野心，家下就只求做好本分，就連擇偶條件亦唔同，話明要求高咗，以下系佢真情自白（絕對足本，未經剪輯）：「靚女一定要，樸素啲，因為我都系樸素嘅人，啱啱食完雞蛋仔，自己好鍾意食街邊地道小食，女朋友要容易開心、容易滿足同容易凼。」Stephy靚女就梗啦，但就系冇乜見過佢食街邊嘢，樸素應該唔會，因為成日撞見佢買衫。至於Stephy系咪好難開心、唔易滿足同難凼，未相處過唔敢講，唔通方力申趁一周年「紀念日」有感而爆，暗示鄧麗欣難服侍？

其實佢同Stephy本來系愛情神話，當飛魚王子遇上青春女神，怎料，經過一個暴風嘅晚上，完全被打落凡間試煉，「金童玉女」變為「痴男怨女」，兩個人一分手就好似攬炒，好似齊齊「撞邪」咁，Stephy突然「轉性」多咗個同性密友，十足男人勿近！反而方力申變身情場浪子，系女都啱，莫講話賭王千金，連女粉絲都唔放過，認真十年功力一朝喪，之前儲落嘅陽光正能量全部沽清。猶記得舊年佢哋一宣布分手，引發全城網民瘋狂式洗版討論，震撼程度好似原子彈喺MK引爆咁犀利，個個當正好似自己甚至阿爸阿媽離婚咁傷懷，依家搞到咁，好多粉絲應該好戥佢哋可惜。有人話佢哋當日身邊冇個和事老，先發展到目前呢個死局，咁如果有take two，解鈴還須繫鈴人，除了葉念琛不作他人想。