撇低女友祖兒！劉浩龍靚車接「女」小方擇偶要求變高要好過鄧麗欣？

娛樂 03-25

今日快報

撇低女友祖兒！劉浩龍靚車接「女」

劉浩龍（師兄）與天后女友容祖兒拍拖多年，感情相當穩定，最近女友不時於社交網站曬與鄭希怡得意囡囡梁浸浸的溫馨合照，流露出恨女情懷，其實除了祖兒母愛泛濫，原來師兄亦一樣偏愛小女孩。

日前晚上九時多師兄撇甩祖兒，獨自現身跑馬地行便利店，只見他在店內漫無目的地到處逛，睇完零食又揀飲品，然後再站在雜誌架前打量，最終揀了一袋零食離開。當師兄步出便利店時，剛巧碰見相熟的女友人拖著兩名小女孩經過，只見原本無厘神氣的師兄一見三母女實時心心眼，期間冧滋滋地彎身與兩名小女孩傾偈。

父愛爆棚的師兄更二話不說招呼三母女登上其靚車，更落力地探身入車廂收拾，處置好后座的雜物讓三母女可以舒服地入內，然後便如同租車司機上身，親自駕車送三人往附近的屋苑。抵步後，師兄更依依不捨地目送三人離開始開車走人，觀乎師兄一派細心慈父樣子，他日必定可以勝任做個好爸爸。

為咗幫阿Sa？阿嬌唔肯借錢畀陳偉霆

藝人鍾欣潼（阿嬌）近年到內地搵人仔，日前更被拍到於上海陪內地富二代秦奮打波，隨即傳緋聞，身為秦奮內地網紅女友的「喜哥」火速在網上宣示主權，上載與秦奮的合照力保女友地位。

而一直視秦奮為好朋友的阿嬌日前錄像內地節目，被主持人的問題考起，主持人舉出四個曾合作的男藝人名：「如果謝霆鋒、陳偉霆、吳彥祖同馮德倫四個人問你借錢，會借給誰？」阿嬌爽快說：「借給吳彥祖，因為與她合作時感覺到他很Nice，霆鋒太有錢不會問我借，另外兩位我不會借。」

此時，即惹來她為幫好姊妹蔡卓妍（阿Sa），而嬲對方的舊愛陳偉霆，阿嬌透過電話否認說：「沒有特別意思，不要胡亂猜測。」

小方擇偶要求變高　要好過鄧麗欣？

藝人方力申出席慈善活動，他透露自己已經擔任了7年以上的大使，亦是「點滴是生命」的榮譽顧問，加上自己是游泳運動員的身份，所以有關於水的事情都會特別留意。

小方表示以前因為練水的關係，所以會一日沖三次涼，覺得水對自己來說是垂手可得，但去了山區探訪後，令自己更加珍惜食水，更將壞習慣改掉：「以前會浸浴，但依家就會沖花灑，連頭髮都剪短啲，依家沖涼5分鐘搞掂。」

小方直言媽咪平日都急躁，自己都會叫媽咪放慢腳步，如果唔系命都會短几年，而自己因去多了探訪都學懂了放慢腳步，同珍惜身邊的人和事。問到可會因此而少了衝勁？小方笑言：「都會有少少，都上進，做好自己本份，會少咗野心，但唔代表唔認真工作！」

另外，問到擇偶條件可有因而改變，小方指要求比以前高，笑言：「靚女一定要，樸素啲，因為自己都系，自己都好鍾意食街邊嘢，好似雞蛋仔咁。（拜金女唔啱你？）未遇過喎，容易開心、容易滿足同埋容易凼！」

【環回立體聲】蔣麗莎公開一家六口生活

相信大家都好好奇，究竟陳浩民同老婆蔣麗莎一家六口加埋工人姐姐平時系點樣生活？咁多個細路間屋要幾大？呢日蔣麗莎就喺微博玩直播，公開咗佢哋間陳氏大宅，仲影埋陳浩民做廚男嘅一面！而重點就梗系佢幾個細路，間屋好似環回立體聲咁，熱鬧到呢～

蔣麗莎先嚟影住戴上頭箍嘅陳浩民，原來佢準備緊午餐畀幾個下晝先返學嘅仔女！但冇耐，仔仔就入廚房嗌Mama投訴，相隔一陣，大女又同仔仔鬧交仲差啲喊，呢個moment救兵陳浩民出嚟擺平局面，之後又輪到三女忽然興奮狂叫，成間屋根本冇靜過，系0.0001秒都冇…蔣麗莎仲要一路追住佢哋，顧得呢個唔顧得嗰個，網民都留言贊佢兩公婆真系好犀利！

蔣麗莎都忍唔住自爆畀朋友話佢哋兩公婆好似頭頂有個玻璃罩咁，就算小朋友點嘈都聽唔到，可以繼續同老公聊聊天，與世隔絕咁！講講嚇蔣麗莎仲向老公「施襲」，從後抱抱又獻吻，搞到陳浩民失曬魂，語無倫次！雖然真系好嘈好嘈，但見到佢哋一家六口咁開心，系幸福嘅！

比賽負G.E.M.被翻帳　JW：佢入行早過我

JW（王灝兒）甫出道便被指與衛蘭「撞聲」，又被翻出多年前於歌唱比賽敗給鄧紫棋（G.E.M.），JW不諱言曾經不開心和委屈。不過唱歌是她的最愛，儘管去年被爆與「12億太子爺」Tarzan Ip拍拖，她也沒打算做少奶奶。

16年是JW豐收的一年，她直認恨上紅館，不擔心像吳業坤一樣遭受負評，她說：「嗰時有好多聲音，但最後佢個場都系滿嘅。最緊要有足夠準備，起碼要夠歌啰，我嚟緊一、兩年要儲多啲歌。」提到G.E.M.早於11年舉行過紅館騷，JW強調從沒與對方比較，而且當年兩人參加的比賽不盡相同：「咁啱一個比賽輸畀佢，唔可以用一樣嘢衡量。始終佢入行早過我好多年，冇得咁樣計，大家行嘅路唔一樣。」