城城真摳？天王嫂方媛穿最低檔禮服苟芸慧爆老竇好滿意陸漢洋

娛樂 04-23

今日快報

【電力驚人】蔡思貝曬蜜桃臀冧粉絲

向來電力十足的蔡思貝，入行以來幾乎和所有合作過的男對手都曾傳緋聞，人前人後經常施展誘惑的她，雖然近來於新劇的演出被外間指演技麻麻，不過依然風騷過人，日前蔡思貝悉心打扮出席公開活動，吸引大批支持者撐場，眼見粉絲們落力撐，蔡思貝亦甚為識做，完場後和眾粉絲近距離接觸。

現場所見蔡思貝與數名相熟粉絲拉大隊到停車場，召開「小型見面會」，期間心情大好的她接過粉絲送上的格仔衫，即場穿上和大家組成一式一樣的「格仔黨」，被一眾鐵粉團團圍著影合照，只見她有求必應，表情多多之餘更主動搭住女粉絲，冧到大家笑不停，及至拍完照後蔡思貝脫下格仔衫，烏身入車箱取東西，其間籮趷趷，大騷其豐滿蜜桃臀，極盡誘惑。

蔡思貝與眾粉絲在停車場熱熱鬧鬧地說不停，未幾已引來保安人員前來了解，蔡思貝主動解釋大家只是傾一陣，為免影響人，立即禮貌地向大家告別，獨自登上車，直駛電視城開工。

千嬅畀樂仔「言語欺凌」：差啲精神病！

藝人楊千嬅及余文樂日前於旺角為其主演的新片《春嬌救志明》進行宣傳。談到二人於戲中不乏床上戲，千嬅搞笑爆內情：「床戲都唔系我做咁滯，佢同導演做畀我睇，我企側邊似個看護。」樂仔再提千嬅於戲中大玩制服誘惑扮護士，戲言對方將制服帶回家「公器私用」：「拍完套制服好似畀佢攞走咗，結果丁生（丁子高）嗰排冇跑步，可能攰得滯。」千嬅全程被樂仔狂窒，她笑言拍攝前後均受對方「言語欺凌」：「同佢拍得多會精神病，疑神疑鬼！」而樂仔抵死地回應：「你最多亂經啫！」此話一出即獲千嬅神回一句：「你又知我亂咁『驚』慌？」

緊貼城城　50歲何啟南做老襯娶楊穎

繼前日天王郭富城結婚之後，估唔到今年50歲嘅無線資深演員何啟南，昨日都同圈外女友楊穎正式註冊結婚！今年三月何啟南入紙同女友註冊，當時佢仲話婚期定系年尾，仲話未知點樣搞婚禮添！

昨日佢嘅好朋友兼歌手胡渭康於社交網站上載佢哋兩個註冊時嘅相，原來系成班朋友見證佢人生踏入新階段，當中仲有吳啟華同埋黃澤鋒添，胡渭康留言：「恭喜何生何太！」而18個小時前，何啟南IG亦上載張花球相，仲留言：「準備好」，睇嚟要升呢做人夫嘅佢真系好開心！

【待嫁的心】苟芸慧爆老竇好滿意陸漢洋

藝人苟芸慧（苟姑娘）出席鑽飾品牌活動，以低胸Tube dress晚裝上陣示範鑽飾，性感又耀眼！她表示一直熱愛珠寶設計，希望將來結婚能與珠寶品牌合作打造屬於自己的鑽飾，又笑言由將來老公親自設計更Sweet：「唔一定名貴，最緊要有心思。（加入車嘅元素？）成架車都系鑽石，好恐怖喎！」

問到可有收過男士送鑽飾？苟姑娘表示沒有，反而自己送給自己。至於收到求婚戒指未？她說：「未呀。（咁慢！）唔好望住我喎，唔關我事。好多嘢系雙方嘅，伴侶最後會變成屋企人。（隨時準備嫁？）我覺得我系Ready。（欠求婚呢個動作？）你哋唔好幫佢問，留番畀佢。」苟姑娘表示已見過雙方家長，並透露爸爸大讚賽車手男友陸漢洋細心又負責任，問是否以前男友不負責任？她說：「爹哋系男人，有一定嘅睇法，佢覺得佢系可付託終身嘅對象。（贊你眼光好？）佢比較保守，唔會講咁多。」