六月黃 作者：沈嘉祿 朗讀：牛美華

六月黃 作者：沈嘉祿 朗讀: 牛美華

辣一動就汗「淌淌渧」個六月，上海人只相信西瓜個紅或者黃瓜個綠，要勿是就是哈根達斯個奶白與淺紫。不過，我還是要嚴重提醒各位噢：辣上海人個時令風味當中，還有一期一會個六月黃！是個，作為一個辣辣石庫門弄堂里長大成人個上海人，我心裡向總歸有一小塊地方為六月黃留辣海。現在，伊拉辣辣朝我個記憶深處奔過來，高舉蟹鉗，邪氣威武雄壯個方隊！

春天吃筍，夏天吃瓜，秋天吃蟹，冬天吃羊，是上海人個飲食習慣、審美追求，也是對時令個高度認同。即使是辣辣海呼喚唐詩，宋詞回歸日常個溫馨氣氛當中，或者當朗讀課成為秀場個今朝，上海人也嘸沒改變吃，吃，吃個亢奮節奏。

再講六月黃個季節，就是氣壓下沉，忽晴忽雨，衣裳老啥發霉，頭髮，皮膚甚至於眼睫毛儕黏搭搭個辰光，最能安慰上海人個美食，就是大閘蟹個先遣部隊了。

儂可能會得講，上海人對大閘蟹再有真感情，對看上去「有點腦殘」個六月黃，是勿是吃勿到大閘蟹再嘸沒選擇個移情別戀阿。搿閑話雖然講刻薄，但也勿算大錯，上海人對大閘蟹感情之洶湧澎湃，如痴如醉，死去活來，可以令全國人民瞠目結舌，勿可理喻。辣大閘蟹還嘸沒登盤之際，大閘蟹個小鮮肉、小蘿莉就擔當起了為正規軍鳴鑼開道個使命，單憑搿個一點，就嘸沒理由小看伊拉。當然咾，老吃客心裡煞煞清，六月黃搭仔大閘蟹雖然是同種同文，同屬江南文化圈，一道從古老個民間傳說當中走過來，但是畢竟分工不同，烹飪方法，與吃個方法也大勿一樣。

大閘蟹可以用勿加任何佐料個水煠或者清蒸，來獲得真味，而六月黃必須要藉助於濃油赤醬個本幫手段提升品位。今朝個大閘蟹勿再具有野生條件，只能講究是「最後一公里」，辣生命最後幾天到陽澄湖蹲過學習班，領過證，踱過金，身價就陡然大增。六月黃呢，就嘸沒介講究血統、門第搭仔環境，看上去賣相還可以就OK。

最後我還要講，六月黃為喜歡美食個中國人奉獻了花樣年華，我伲至少也要報以足夠個真誠，真誠個烹飪、真誠個享受，包括真誠個維護搿點蟹個生長環境。迭能，再能用尖尖個筷頭挑起一砣金燦燦個蟹黃，照亮我伲碌碌無為個人生。

喜歡這篇文章嗎？立刻分享出去讓更多人知道吧！