韓流角色不討好惹抨擊 金所炫：拍攝《君主》令我喪失信心

由俞承豪、金所炫、L等人主演嘅MBC劇集《君主－假面的主人》噚晚大結局，分別以13.3%及14.4%收視率成為同檔劇集冠軍。而池昌旭主演嘅SBS《奇怪的搭檔》分別以8.5%及9.5%收視率排名第二，KBS七日的王妃以4.7%收視墊底。

雖然《君主》中俞承豪及金所炫系happy ending，不過L為救金所炫而擋刀致死。L噚晚於Instagram公開手拎劇本嘅照片，留言表示：「感謝直到最後都一直關注《君主》嘅觀眾們。第一次挑戰史劇，對我嚟講有啲困難同辛苦，但都因此學到好多。多謝一起演出嘅所有前輩、演員及工作人員，可以跟大家合作系我嘅榮幸。《君主》會成為令我印象深刻嘅作品，真心感謝支持嘅觀眾。異線（劇中角色名），於天國一定要幸福呀。」

而金所炫於劇中飾演嘅韓佳恩，於李煊（俞承豪飾）及異線（L飾）之間搖擺不定，多次因私自做決定而惹出事端，最後異線更為救佢而喪命，令觀眾稱韓佳恩為「麻煩女主角」。金所炫今日接受訪問時坦言：「其實我有啲傷心，我都唔系太理解佳恩大部份行為，但系電視劇唔能只講述佳恩一個人嘅故事，描繪佳恩呢個人物時表達得唔夠親切，充分能夠理解大家覺得佢麻煩嘅想法」

金所炫坦言接到劇本時被佳恩嚮往自由嘅一面所吸引，亦一直努力維持佳恩呢個特性，但於劇集後半部分出現對角色難以理解嘅部分，令金所炫感到好遺憾：「飾演反派角色都要百分百理解後去表演，佳恩為左報仇不斷埋怨及尋找殺父仇人，有時候我會納悶究竟呢個系最重要嗎？」

金所炫承認《君主》系令佢感到好吃力嘅作品：「我思考左好多，拍攝過程中，我發現並唔了解自己，所以對飾演嘅角色都產生恐懼，有種失去自我嘅感覺，喪失信心。」又話：「有時笑嘅場面笑唔出，勉強自己露出尷尬嘅笑容，系我第一次經歷嘅事情，呢部作品令我陷入小低潮。演嘅戲越多，越感受到表演嘅難處，因此經常向前輩請教。」

而18歲嘅金所炫透露目前會專註學業，準備大學嘅自學考試，會休息一段時間，短期內冇接下部作品嘅計劃。

喜歡這篇文章嗎？立刻分享出去讓更多人知道吧！