十年是非無損唱歌夢 江若琳：這麼多年我也沒有賺到什麼錢

2007年出道的江若琳，可以說是比同期的新人走得較快，除了可以出唱片，又為多部電影擔正，更被封為「新一代少男殺手」，以初出道的歌手來說，曝光機會多的是，但後來卻因為與前經理人公司有合約糾紛影響工作，問到她有感覺得起步快，卻跑得比其他人慢，因為「黃金時間」都花在打官司上，對此她似乎很豁達：「我覺得時也命也，如果上天要我呢十年經歷咁多嘢，我覺得無問題，我個人好知足，我唔覺得行慢咗。我見到我同期嘅朋友成功，我都好替佢哋開心。我係一個唔會同人比較嘅人，如果我日日都諗點樣大紅大紫，我會令到自己好辛苦。掉番轉諗我反而會多謝我過去十年有呢啲經歷，因為有過呢啲經歷，令我識得享受現在，令我依家睇嘢睇得好輕，只要我有得繼續唱歌演戲，我就已經好滿足。」

江若琳大談過去負面新聞的感受。

Elanne在出道時被封為「新一代少男殺手」，標誌的「大眼」依然電力十足!唔信?睇相啦!

Elanne性格「超硬正」面對各種風雨無畏無懼。

每次見到江若琳在娛樂版出現，都是一些是是非非，到現在更捲入官司之中，話雖如此，但她依然「超硬正」：「我承認我每一次遇到嘅事都好大起大落，一係唔跌，一跌就跌入谷底，甚至啲新聞或者網民嘅輿論都係好負面。我認我係有一刻諗過放棄，好似前幾年被人屈，甚至係近年有官司糾紛都好，我好多謝自己有一份好倔強嘅性格，我覺得呢個世界唔應該係咁，我唔想向不公平，不公義低頭，如果就咁就放棄，就等於向惡勢力低頭，所以我覺得如果我仲有力氣嘅話我會繼續去抗爭。」

(對於種種指控有無唔甘心?)

「又唔係唔甘心嘅，只不過呢啲事件直接影響我個人聲譽仲有我嘅人格，所以我先有咁大反應，如果我單純為錢，我一早放棄做歌手啦，反正做咗咁多年我都無咩賺過錢，而打官司又要洗咁多錢，不過我覺得依家係幸福嘅，因為雖然有官司在身，但我依然可以合法地去實驗我嘅夢想。」江若琳笑言。

每次提起男友Oscar，Elanne仲會不自覺地傻笑。

提到江若琳最近推出的新歌《我只不過是我》，歌詞提到她如何在各種勉勵自己走過每一個難關，Elanne坦言這首歌就是真正的「江若琳」: 「呢首歌係嚟緊音樂會嘅主題曲，亦係我過去入行咁多年最鍾意嘅一首歌，因為真係好代表到我自己，亦係我過去十年嘅一個紀錄。今次係由一班麻甩佬幫我製作呢首歌。呢首歌嘅製作班底都係由蕭潤邦(男友Oscar)搵番嚟，作曲由樂隊MR嘅Dash仲有音樂人Jerald，而填詞人我當時就緊係想搵啲好勁嘅大師啦，因為呢首歌真係好重要，點知我身邊嗰條友(Oscar)就突然發聲話『其實填呢首歌嘅人一定要係了解你內心世界嘅人啰』，跟住佢就話『其實我咪識得填詞啰』，跟住我就諗，可能真係無一個好似佢咁了解我嘅人，於是我就叫佢幫我寫，當然細so(蘇耀宗)都有幫手，所以就有呢首歌。大家可以留意下歌詞，呢首歌係少有地無重複過歌詞，就連副歌都無重複，因為填詞嗰個人話有太多嘢想表達，每一句都係我嘅故事。呢首歌想話畀人聽，其實我只不過係江若琳，我從來無高人一等，我唔係明星亦都唔係偶像，我只不過一個想實驗自己夢想嘅女人仔。」

江若琳將在9月初舉行十周年音樂會。

據《KUGOU.TV》報道，談到9月一連兩日音樂會，Elanne愈講愈興奮：「依家音樂會到排練得如火如荼，今年係我入行十周年，我唱好多以前嘅歌曲，不過好耐無唱，依家諗起都有啲驚。今次音樂會我都會跳舞，但大家唔好期望係我會勁歌熱舞，而係一啲好有故事性嘅舞步，我亦都會有一啲才藝表演，不過呢個就保持神秘先，總之依個騷都係以party感覺為主，我希望真係可以個個入場觀眾都可以一齊玩，大家可以笑住走。」

在圈中人緣甚好的江若琳，希望籍著今次十周年音樂會去多謝每一位支持及幫助過她的人：「呢個騷我都好希望會邀請一啲喺過去十年有幫過我嘅朋友嚟一齊玩，猶其係當年一齊出道嗰班同期朋友，仲有希望請到一班喺過去十年對我好有影響嘅前輩做我嘅嘉賓，其實做唔做嘉賓都係其次，最想係借今次呢個舞台去一一多謝呢班人。」

喜歡這篇文章嗎？立刻分享出去讓更多人知道吧！