終於有「合照」！郭富城曬一家三口手指相視後三連霸？胡定欣硬撼鮑起靜：唔敢諗

娛樂 09-24

今日快報

終於有「合照」！郭富城曬一家三口手指相

現年51歲的天王郭富城榮升做爸爸，「城嫂」方媛於9月1日在養和醫院為城城誕下BB，惟二人及城城經理人都封口唔提，直到今朝近十一時，城城忽然在社交網上載一家三口手指相，終於宣布BB出世，溫馨滿瀉！

早前就有媒體曾率先爆BB重5磅10安士，而城嫂在醫院住了幾日就已秘密出院，不過有知情人士爆料，城城的BB仍需留院觀察。

未知是否BB終於出院，一家三口可以團聚，所以城城都興奮甫上三人手指「全家福」，向網友分享喜悅，並留言：「開心、微妙、感恩！我們仨！成長、家庭、守護！」而方媛亦都極速轉發咗城城呢個Post。

早前一直有傳城城喜獲愛女，不過城城及方媛喺社交網嘅留言均用上男仔BB嘅icon，有網友指城城系一索得男，紛紛送上祝福，為郭家傳宗接代。

不過社交網嘅emoji BB公仔一向都冇分男女，咁究竟郭富城嘅BB系仔定女？就要等城城自己公布喇！而下星期二（26日），城城將會出席化妝品活動，屆時將會同大家分享做咗爸爸嘅喜悅。

有望揚威海外！《一念無明》角逐奧斯卡

由藝人余文樂、金燕玲、曾志偉等主演的電影《一念無明》代表香港角逐「第90屆奧斯卡金像獎最佳外語片獎」，此片由製片家協會董事局成員由2016年10月份至2017年9月份期間當中上映的四部香港電影中挑選出來。

視後三連霸？胡定欣硬撼鮑起靜：唔敢諗

無線劇集《同盟》演員胡定欣晚上在將軍澳電視城出席劇集「祝捷晚宴」，晚宴筵開十席慶祝劇集大結局7日跨平台總收視錄得31.8點，有約207萬觀眾捧場。

提到胡杏兒昨晚出席活動時透露有「胡說八道會」姊妹將會很快有好消息公布，最大的「可疑人物」是姚子羚與黃智雯，胡定欣笑說：「我都想知杏兒講邊個，除咗我之外，個個都有可能，連豹嫂（胡蓓蔚）都有可能，哈哈。」

《同盟》大結局收視好，胡定欣當然希望添食，她說：「希望原班人可以拍啲新題材，戲裡面我同鮑起靜比較少對手戲，如果有機會再開可以做試嚇做兩母女，拍啲溫情片。（今年視後有信心？）今年有鮑起靜唔敢諗，有得一齊提名都開心。其實今年有好多新挑戰，大家都接受我呢個動作演員、打女都幾好，又唔會話怕咗打，將來有機會都想繼續向動作演員發展，自己有能力做到，觀眾又賞識，都好開心。」

咁大膽！張晉請史泰龍食「兜拳窩面」

由荷里活巨星史泰龍（Sylvester Stallone）主演嘅動作大片《逃亡大計》（Escape Plan）已經嚟到第三集，繼上一集有黃曉明之後，新公布的演員名單中，就發現有張晉嘅名字，咪以為佢喺戲入面做行行企企嘅閑角，最新消息張晉會飾演第一集海上移動監獄獄長嘅養子，佢今次出場就係為咗要向史泰龍復仇，更會綁架史泰龍嘅愛人上火車監獄，等史泰龍上嚟救人再同佢決戰，真系夠曬睇頭！

張晉之前喺電影《殺破狼II》入面飾演獄長一角，除咗功夫了得之餘，陰狠嘅眼神令觀眾留下深刻印象，今次再演獄長，加上要同史泰龍激戰連場，相信大家都非常期待！張晉唔想大家等咁耐，就率先喺微博甫咗幾張同史泰龍對打嘅相，其中一張，張晉仲一拳舂落史泰龍塊面度，佢仲留言話：「看看誰的拳頭更硬。」

唔少網民留言話希望可以快啲睇到佢地嘅對打場面，不過黃曉明有份演出嘅第二集預計出年上映，張晉參演嘅第三集睇怕都要2019年先有機會上演，一眾想睇佢哋對打嘅觀眾就真系要耐心等待嚇！

為傾談合作細節而與史泰龍在美國會面的張晉接受訪問時表示：「史泰龍系我由細到大睇佢做戲嘅Super Star，依家可以有機會同佢合作，當然系好開心，（第一次見面感覺如何？）覺得佢好Nice、好Friendly，亦睇到佢對電影一直都好有熱誠，呢啲都系我好值得去學習嘅地方。」

試新歌路　楊千嬅拍新MV勁緊張

楊千嬅為新歌《Wonder Woman》拍攝MV，千嬅覺得今次的心情好似有幾年沒有拍MV般既緊張又興奮，而且有個怪感覺，緊張程度令她自己也不相信，可能她是個奄尖之人，這首歌的歌路是她以前從未試過唱的。她笑說：「大家唔好以為我系Wonder Woman，雖然我個樣似系！」

對於這首歌的構思是來自電影《Wonder Woman》（神奇女俠），千嬅說：「因為我好鍾意電影裡面嘅女主角，而今時今日嘅Wonder Woman已唔只系一套電影，一個角色，而系一個女性嘅能力提升，同埋忍耐堅持意志，可以套用喺現代女性身上，有時我做緊藝人工作，但學校打電話嚟話個仔早咗放學，可能只系2秒鐘時間，咁又做番人阿媽，講完收線又即刻轉番演員，又或者變身上台做番歌手唱歌，跟住個仔打電話嚟又凼嚇話收工返屋企食飯，角色隨時會有變換！」

令千嬅覺得人生有不同角色，這樣才是精彩，同時亦要感恩，當她有朝回望過去發現自己的能力是有一份滿足感，無論遇到開心或不開心事都是個人表演時間，當處理最壞的事但懂得用最好心情去面對就是贏家！這首歌是想表揚大家曾經的努力，無論是好是壞都有一種滿足感！

王雙駿今次是《Wonder Woman》監製及作曲人，他笑言難得千嬅肯陪他一齊癲！千嬅即插嘴自言是全公司最癲一個！王雙駿表示今次想用非一般拍法，想加強音樂節奏感，最重要是有型，他每晚瞓覺都想如何拍攝，個腦是沒有熄過機的，所以靠後期製作來將他的夢境呈現出嚟！千嬅贊同表示：「做得太耐要撞啲新嘢出嚟，希望觀感上有啲新刺激！」

薛凱琪出新歌講暗戀　方大同幫手作曲