抱團養老成為流行趨勢
點擊上方藍字關注
抱團養老成為流行趨勢
樓底下碰著兩個大年紀佬,平常住養老院,放假么把小佬接家來住幾天。看見老鄰舍么,高興到則拉則手講弗完格話。
說到這個養老院啊,跟原來格概念弗一樣,老早頭么是好像嘸依嘸靠,弗能自理才去,現在是自家有退休工資,身體蠻好就去格咧。尷則啊,檔次低點頭兩千塊一個月格吧,弗少人覺著條件弗來事。三四千塊一個月格吧,全想去,人太多住弗進。你要再貴點吧,去格人又少格咧。所以啊,居家養老還是絕大部分。倒是這兩年出來一個新動向,叫抱團養老。就是幾家關係好佬格老夫妻,尋個地方一道做鄰舍。
抱團養老啊,頭一個是有一定格經濟條件,應該是住則起養老院格,第二個是有講則來格朋友。格么做嗲弗去養老院呢?過頭么人還要多哇。
這個啊,先要說啊,只要弗管是包團養老還是去養老院,都是弗想做空巢老人,怕孤獨。格么去養老院啊,有辰光弗見則就弗孤獨,人格性格脾氣弗一樣,人再多,可能你也只跟講則來格人有話說。房叻看看電視,出門晒晒太陽,等則禮拜天小佬來看看,送幾隻歡喜佬格菜吃吃。
這些有小輩格年紀大佬么,有幾個是自家真心想進養老院格呢?也全是小輩格意思哇,無非是有格免嘲氣知趣點,有格是已經有矛盾咧。養老院來則么,身邊人又嘸么揀,碰著對勁佬么算運氣,弗對勁么就少來去。
所以,抱團養老越來越多格原因,恐怕就是身邊全是跟自家人一樣格,互相了解,脾氣合則來,弗會弄則心叻有疙瘩。這佬格養老方式跟養老院弗一樣哇,過個是被動,這個是主動哇。一個是送進去格,一個是自家要去格。
說到底,養老最主要格就是要有人陪,還要講則來。所以,有人寧可一個人獨居,也弗去養老院。
老有所養現在基本全能夠做到,格么老有所樂才是真正格養老,走這個角度來看啊,抱團養老倒恐怕是頂像格。
撰稿:顧慷
演播製作:高翔
GIF
GIF
TAG:常州新聞綜合廣播 |