做人家人老孫
歡迎關注，歡迎留言互動
三門灣鄉音
從讀音及變調習慣上來看，廣義三門話的區域遠遠大於今之三門縣域。寧海、象山的南部區域，臨海東部諸鎮及椒北地區，甚至天台東鄉區域，這麼一大片範圍內的語言相似度極高，這也是本公眾號名為「三門灣鄉音」的原因。
做人家人老孫
大勢家好！時間過來老快，眼一記?亦要過年了。過年過節鈔票用來也勞，娘伯望望心痛，長在邊的念：「做人家點，難鈔票不當鈔票樣。」
好，今日便講講做人家人老孫個故事。
早箇幾日零下四五度，枯心頭霜冰（冫夾）來便厚猛厚，人冷半小死。聽人講，老孫感冒發燒，送得醫院打針啜葯，幾百塊用爻，渠心痛來便搿搿抖。
仔細問問嚇識得。箇老孫屋裡還兩包感冒沖劑剩的，快要過期了，斷斷爻忖忖亦不捨得，想啜，人亦無感冒。扣箇兩日冷空氣來，渠且忖：「khuaeh便冷水澡沖只，妝妝凍，好畀箇兩包感冒沖劑啜爻。」嚇渠夜飯啜爻便去繳身家。
箇時節，外頭水管都快要凍牢了，人絞襖筒牢定都還凍來搿搿抖，腳節頭便冷木痛，便恰對甮生腳的樣。渠衣裳一記脫，箇鼻頭涕水啦便對嘮嘈鬼個流瀺樣，流不歇。水箇一記淋人的，整個人便觸電觸爻樣，冷跳來，殺豬樣「賣賣」叫。上下頷牙齒「軋軋」聲撞來，便對軋碎機響樣，人也差點凍硬薧干硬爻。嚇渠想牙齒咬落去勁牢定，何里曉得，渠越做勁，箇上下頷牙齒撞來便越生勁。渠一頭「賣賣」叫，一頭快爽爽一遍摸爻，全身上下冒白氣，皮血澤紅，便恰對在蒸籠里向蒸熟爻個蟹樣。等渠洗出來，頭髮毛也霜冰（冫夾）出來爻。結果渠當夜便發高燒，想熬熬過，差點人也報廢爻。
箇老孫啊，做人家做來便無之過節爻啦，要講渠個事干便三日三夜都講不完，今日便講講啜個事干。
渠年加年三十夜晚頭且幾大碗魚啊肉啊燒來，十四夜無到都無之啜完。頭前幾日挾都（勿會）畀小人挾，講寔畀拜歲客啜，小人得講箸撩過去挾，渠箸撽便咧聲響敲過來。嚇箇魚啊肉啊餐數燉多爻啦，上頭燙氣水便白洋洋，里向個蔥啊大蒜啊都糊糊光，豬食也不如唵，拜歲客望著都懶意思動箸啦。渠還挾得人家碗頭的湊，忖忖便是解門相啦，啜也勿是，不啜也勿是。
六月個時節，菜蔬燒來一界便蔫爻。渠倒便不捨得倒，下餐新菜蔬燒來，便tsha3 tsha3裡頭，結果和家都無人啜。渠還硬死人證，講勿是還好吤？結果都好著渠啜。
還有箇麻糍糕，交春個時節搗來，釀水缸裡頭啜半年，啜得落腳啦，箇麻糍糕里向個齆膿臭啊，便頭臭得腳出，渠還不捨得斷啦。箇日渠畀缸底剩落來個兩段麻糍糕燒燒光，特地呢雞子炒罅得，蔥撒上頭，望望是蠻好相，嗅著便頭都在吤旋光。渠還忖客氣，望著隔壁屋裡個小人讀書對轉頭，便掇碗過去畀渠啜。箇碗麻糍糕桌頭一擺，整隻間里臭來便無可進爻啦。隔壁幾句話畀渠打發轉去，渠箇頭一出去，吤頭隔壁便隨即倒畀狗啜，結果只狗嗅也懶得嗅，逃不至洎樣逃爻。
箇日日晝，便只渠獨個頭在屋裡，忖忖晝飯也懶意思燒，便泡飯啜啜過算數。扣要啜了，肚（勿會）舒服，出去埋坑頭上只。坐箇埋坑馬的，望著上頭一粒飯落的，埋坑蒼蠅也叮過爻。渠畀蒼蠅趕趕逃，捉來講便講啜啜爻嘍。等渠埋坑上轉頭，一隻狗幾時摸進來爻，前腳搭桌的，畀渠個泡飯半碗舔爻。渠畀狗趕趕逃，忖忖倒倒爻亦不捨得，歇嘞，馱鑊的暖暖便啜啜爻嘍。
皇天啊，胃講爻都??動噢。不講算數，大家再會！
圖片來自網路
美國奧的斯
世界最大的電梯製造商和服務商
發明電梯，只做電梯
TAG:三門灣鄉音 |