鄭欣宜紅館開唱鄭少秋捧場 提及媽咪沈殿霞失控爆哭
一連兩場鄭欣宜紅館「Break A Leg演唱會」前晚開鑼，首次登上紅館舞台演唱，除爸爸鄭少秋撐場外，更獲老友許廷鏗、胡鴻鈞、岑麗香、麥美恩、王祖藍夫婦、王君馨、關心妍夫婦、湯盈盈、蔡一智等捧場。
欣宜實行搏到盡，她以一身黑色Bling Bling打扮登場，一出場即除掉黑色羽毛眼罩，獻唱天王天后級的串燒快歌，包括容祖兒的《越唱越強》、《隆重登場》及鄭秀文的《叮噹》、《煞科》、張國榮《大熱》等勁歌熱舞，擘髀又拗腰，唱足15分鐘，氣氛High爆。欣宜唱罷她問觀眾說：「大家仲想唔想再重口味啲呀？」接著唱出《你瘦夠了嗎》。當唱到《你是甚麼時候開始不愛我的？》因耳機失靈她要求重唱。
首晚嘉賓有謝安琪（Kay）及樂隊Supper Moment，欣宜介紹Kay出場時不忘賣口乖，大讚Kay老公張繼聰，她說：「男人個樣當然重要，但系身材都好緊要，再加上又顧家又有幽默感，你哋話邊有咁好嘅男人？就好似以下落嚟我呢位嘉賓......個老公咁！」
穿藍色長裙的Kay表示好欣賞欣宜：「呢句說話我一定要喺台上講，我真系欣賞咗你好耐，我知道嘅鄭欣宜有好多面。我想話畀你知，無論系爆喊嘅你、好堅強嘅你、自由嘅你、懷疑自己嘅你，無論邊一個你都系咁美麗嘅。」欣宜亦大讚Kay十分仗義，一聽電話即答應。
欣宜有感而發讀出草蜢金曲《失樂園》歌詞「結果我共你，仍然逃不過被圍攻、被捨棄」來形容初入行惹負評感受，她說：「我成日畀人批評，但無放棄自己，都想盡努力由負分變零分，再一分一分加上去，我深信只要堅持努力，總有一日會合格，希望大家看完今晚演唱會，畀一個公道的分數我。」成功實現紅館夢，至於下一個夢想，她興奮地笑道：「搵番個Dream Guy結婚生仔。」
當欣宜獻唱歌曲《擁抱愛》時，全場觀眾亮起手機燈的場面，令她感動得一度哽咽，強忍淚水繼續唱下去，但到尾聲唱出《給最開心的人》送給已故媽咪肥姐時終失守哭爆：「呢個騷有好多人幫我、錫我，本應應該好知足，但仍然有一個好大遺憾，就是佢睇唔到我喺紅館第一個演唱會。」
台下觀眾紛紛出言鼓勵，語畢她再說：「但朋友同我講話佢一定響度，成個過程佢都陪住我身邊，直至今日都陪住我跳、陪住我笑、陪住我喊，所以我要將最後一首歌送畀我嘅最愛。」而演唱會亦都於晚上接近11時落幕。
