劉德華為港劇覓新題材，《東方華爾街》五集橫跨廿年！第二季會有桂綸鎂？

劉德華監製、黃國強（KK）執導、吳鎮宇、張孝全、廖啟智同潘燦良主演迷你劇《東方華爾街》，將於今晚（24號）喺衛視電影台首播。今次系美國福斯傳媒集團（FOX）進軍香港劇打頭陣之作，每集製作達100萬美金（約港幣800萬）。

《東方華爾街》以亞洲金融市場為題材，只有五集，但劇情橫跨二十年，牽涉政府和金融體系。劇集原名《香港華爾街》，但故事背景唔系香港，而系「高雲城」（向Gotham「致敬」？）故事講發展局副局長葉抱一（吳鎮宇飾）與「三大巨鱷」——地產商文啟山（張武孝飾）、建材商霍堅（張雷飾）及傳媒機構老闆張融（羅家英飾）官商「合作」，操縱市場，從中獲利。為咗搵更多，仲安排畏罪潛逃嘅金融奇才韋航（張孝全飾）回嚟，一齊食大茶飯。

吳鎮宇同張孝全本來系地下金融精英隊伍「CASH」嘅親密戰友，亦師亦友；兩人聯同隊友卓意寧（譚耀文飾）、Pamela（張可頤飾）一起擊退金融大鱷，阻止莊家造市，但鎮宇卻出賣CASH，令張孝全失望之極，仲同陳家樂、蔡潔、潘燦良等另組新一批「CASH」，對抗鎮宇……

（微劇透，可翻過這段）

首集一開始，鎮宇喺議會接受質詢，鏡頭一轉就交代張孝全喺緬甸點樣用佢嘅方法手段救市，然後就跳咗去鎮宇搵番已關係決裂嘅昔日戰友兼徒弟張孝全返嚟高雲城，一齊設局，引張雷同張武孝入局，呃佢哋資金！

張孝全表面上不計前嫌，但系實際上系借力打力——利用張雷同張武孝嚟打擊鎮宇。此時交代番十年前白武士CASH決裂經過，最後仲令張孝全同張可頤一段姊弟戀告終。

機關算盡嘅鎮宇，對自己徒弟同戰友既不手軟，對身邊人更甚，包括拉上司梁健平落馬，再取得財務部首長廖啟智信任，令自己嘅仕途更上一層樓。

話分兩頭，另一邊廂嘅陳家樂，為咗阻止興建數碼金融城而發動抗爭，最後警方出動催淚彈，鎮宇借意到現場，勸大家唔應該用抗爭方面解決問題，企圖收賣人心，最後張孝全伺機暗中拉隴陳家樂，加入佢哋嘅新CASH。

正如監製劉德華喺噚日嘅發布會咁講：「其實嗰5集都會好緊湊嘅，因為5集講咗20年嘅金融風暴，所以平均一集講咗四年嘅嘢，大家千祈唔好miss。」成個故事嘅節奏真系好快，因為故事涉及金融市場黑幕，如果唔熟悉股市運作，最初未必太理解，不過睇到中段就會Pick up到，甚至覺得人物造型有啲似曾相識嘅感覺，某程度好近似當年《選戰》——溫馨提示，《東方華爾街》系由《選戰》導演黃國強（KK）執導。

劉德華向來參與電影較多，點解今次會對劇集有興趣？「因為我是拍電視劇出身，而家劇集製作質素愈來愈高，所以我一定會拍番劇集，看看將來如何安排。制組搵到桂綸鎂演出，我沒有落嘴頭的，純粹用劇本打動她，事實上她的角色寫得好好，好到我都想演。」

?轉載授權微信：lama129

? 商務QQ：1900556960

喜歡這篇文章嗎？立刻分享出去讓更多人知道吧！