切西瓜，吃西瓜

文、音：麥小姐

圖：唐廠長

[由於公眾號平台讚賞功能規則有變化，如想打賞，可長按打賞碼（頁面下方倒數第2個二維碼），多謝朋友們對「麥唐作」的支持！]

搿兩日個天真是熱得來教人吃勿消，高溫警報天天響，辣馬路高頭立脫一歇歇，搿汗啊，就湯湯渧了，用一句流行個言話來講，就是「熱到透明，熱到烊脫，熱到爆炸」。天介熱，碰著休息日腳，假使啥地方都勿想去，就蹲了屋裡空調伏伏冷飲吃吃電影看看，也是老適意個！

天一熱，人個胃口就推扳了。冷粥冷麵冷餛飩，醬瓜鹹菜蘿蔔乾，冰凍綠豆湯，各種糟貨，儕是當季個熱門美食。有辰光偷記懶，吃個幾口西瓜，也可以算一頓唻。阿拉爺老朝會得專門幫我揀點小幼幼個西瓜買回來，汏清爽仔以後，擺辣冰箱里稍微冰脫歇。開個辰光呢，伊習慣辣辣差勿多1/5個位置開扇「天窗」，讓我可以直接用長柄個不鏽鋼調羹挖來吃，假使一記頭吃勿脫，拿原本高頭只「帽子」蓋回去，歇脫歇，再繼續。

我吃西瓜個口味比較「怪」，歡喜吃邊邊浪向個搿一圈，雖然甜是勿大甜，但水分足，又嘸沒籽，吃起來便當。小辰光，每趟吃到搿圈邊，阿拉外婆常怕我弄勿清爽，總歸會得再幫我「加工」一遍，橫刮豎刮，也好有勿少貨色唻。伊還幫搿眼勿甜個西瓜肉起了兩隻名字----豎里向刮個末，叫「長舌頭」；橫里向刮個末，叫「蘿蔔絲」，真是蠻有勁個！至於剩下來個搿只殼，也勿會浪費。拿外頭綠顏色個皮槧槧脫，取當中青白顏色搿層，擺眼鹽kuek一kuek，切成功條或者絲，搭榨菜、毛頭子一炒，就好添只夜飯小菜了，既清爽又下飯。

西瓜有各種各樣個吃法，一分兩半挖來吃，是「獨食式」；切成片是「分享式」；去皮分塊插牙籤，是「服務式」；榨汁是「精華式」。外加噢，就算是頭一種「獨食」吃法，從阿里搭開始挖，也是蠻看得出一個人個性格得脾氣個。有人歡喜直接從當中個「山頭」位置下手，搿能可以最拿好個肉頭先享用脫；也有人歡喜從偏左邊或者右邊個位置下手，搿能吃法，即使旁邊個人看到儂吃自家也覺著饞了，儂還可以脫伊一道分享，既貼心又衛生。不過，勿管是阿里一種吃法，儕是各人歡喜，吃了開心就好。

（初稿20170713修改20180805）

【麥唐作】即「麥小姐」和「唐廠長」的作品，是以滬語（語音口音偏上海市區音；文本表達參照錢乃榮《上海話大詞典》及《上海話小詞典》）為主打的原創方言專欄。文體、形式自由不羈，力求「做得開心，聽得滿意」。

「麥唐作」又取「賣糖粥」之諧音，願為眾友獻上一份帶著生活回甘的「地氣美食」。

本公眾號發布內容（包括文字、音頻及未註明「來自網路」的圖片）皆為原創，作者保留對作品的著作權。未經授權允許，不得擅自轉載。

非常感謝何東先生和何予西同學、陶嵩飛同學，為「麥唐作」公眾號製作、演唱片尾曲。

如有需要轉載或其他工作邀約：

多謝您的支持和歡喜！

喜歡這篇文章嗎？立刻分享出去讓更多人知道吧！