在歌聲中養生

推薦：丁迪蒙

朋友，儂歡喜唱歌伐？儂曉得唱歌有種種好處個伐？今朝，阿拉就來講一講唱歌個優點。

首先，唱歌是有節奏個體內按摩。

唱歌會得沖開人體個橫膈膜，搿就好像是做了次人體內部個循環按摩,是任何一項運動儕代替勿了個。唱歌搭仔練聲，儕能夠擴大肺活量,增加肺泡個通氣量,提高呼吸功能。

唱歌搭講言話勿一樣,唱歌個辰光，需要一定個力量，特別是胸部個力量,胸部力量加強了,肺活量就會得加大。成年人個肺活量一般是3500毫升左右,但是歌唱家個肺活量要4000毫升左右。肺活量一大,呼吸功能就能夠提高。所以講，唱歌是一種提高呼吸功能個好辦法，可以鍛煉人個心肺功能，伊個作用勿比練氣功推板。

第二，唱歌是特殊個心理治療。唱歌可以改變儂個心境搭仔儂個精神面貌。好歌唱勿停,唱出好心情。縱情歡歌,可以放鬆身心。勒嘞唱一隻歌個辰光,人當然是認真、緊張個,但是當儂唱完一隻歌,儂馬上就會放鬆下來,搿能一緊一松，就可以刺激儂個自律神經,本來因為壓力而變得紊亂個神經就會得輕鬆，唱歌可以釋放一種幫助儂靜下心來個荷爾蒙激素，乃末舒解身心。一門心思個認真演唱，會得活動儂交關平常辰光蠻少活動到個面部組織,搿能就可以幫助儂抗衰老,維護皮膚彈性,還可以改善儂更年期個勿適意感覺。歌唱讓儂身心愉悅，煥發青春了，所以儂要拿歌唱當成儂生活中最愉快最舒心個事體來做。

第三，唱歌是一種全身運動。

唱歌是一種全身運動,伊既可以鍛煉全身肌肉,又可以健腦。要想拿歌唱得好,就要動員全身各個部位一道用力。

經常放聲唱可以調氣、運氣、養氣。唱歌個辰光就激發、調節了身體個各種功能,會得讓儂胸部、腹部個運動協調，有利於氣血個運行。

中老年人常庄去練練歌，可以激發對自家生活個信心，也激發對各種事體個興趣。身心舒暢了末，當然也就是保健、養生了呀！

假使唱個歌曲音偏低,可以讓血壓安定；唱快節奏個歌曲呢，又可以讓人開心；假使搿只歌音拉得蠻長，搿就正好可以消除壓力,放鬆精神。

從生理學個角度來講,唱歌除了可以讓人個身體所有個放鬆機制儕處於最個佳個工作狀態，還可以鍛煉所有個肌肉。用勿著自家去刻意個想，要鍛煉啥個地方,一切儕是自然而然做到個。所以講，唱歌是一種真正快樂個健身操。

第四，唱歌可以陶冶情操、健康長壽。

音樂為生活增添了色彩，歌曲能為阿拉帶來美個享受，唱歌是語言搭音樂結合，來表達思想感情個一種藝術形式，伊可以提高文化藝術素質修養，讓人感情豐富，心緒平和。

學唱國內外優秀歌曲，對人個思想道德修養，性格情操熏陶，儕會得有積極個作用。唱歌也會讓儂增長見聞，開拓眼界。勒唱個過程中，抒發自家個情懷，增加搭親朋好友個溝通。

美妙個音樂，美好個歌曲，還可以凈化人個心靈，啟迪人個心智。讓生活更加豐富多彩，來培養快樂向上個生活情趣。

對於50歲以上個朋友來講，假使練習合唱，還可以鍛煉記憶力搭仔聽力，可以幫儂擴大社會交往，收穫邪氣多個友誼。搭歡喜唱歌、志趣相投個歌友一道練習唱歌，既可以感受合唱藝術個無窮魅力，又可以收穫快樂搭仔友誼，唱出健康搭仔長壽！

朋友，走伐！阿拉一道唱歌去！