古天樂尷尬見番23年前劇照　李佳芯唔諗結婚恨吸金　寶珮如角逐最佳女配

娛樂 08-28

今日快報

最索星二代林愷鈴入讀港大建築系

藝人龔慈恩18歲女兒林愷鈴出席化妝品牌活動，被譽為「最索星二代」的她原來讀書都好叻，她透露今年入讀大學，更開心能入到心儀學系，她說：「讀香港大學建築系系我第一志願。（系咪考得好好？）我讀國際預科文憑（IB），滿分45分，我攞咗41分，盡自己努力，已無悔。（媽咪有冇獎勵你？）媽咪對我讀書從頭到尾都放手，當我好努力應付考試時，佢反而叫我出去玩，但我出嚟成績對自己系一個肯定已好滿足。（系咪一直成績好，所以媽咪唔使擔心？）都唔系，我細個掛住畫畫同音樂，成績唔好，到中三、四先臨急抱佛腳。」

問到已簽杜琪峯公司旗下做演員，是否已有拍攝作品？她說：「都接拍咗啲嘢，啱啱拍咗微電影，呢方面都試咗幾年，試咗都好有興趣，依家可以說我系兼職。」她繼又表示本想到外國讀書，但覺得現在所有事都好鍾意而決定留在香港。

擬印刷版將停刊　《TVB周刊》改網上版

每逢星期一出版、一書兩冊的《TVB周刊》於1997年5月創刊，前身為《香港電視》，於1967年11月19日無線開台日創立，兩者均是TVB官方刊物，有指電視廣播（0511）公布中期業績，內容有提到《TVB周刊》印刷本將由網上版取代，即意味出版21年的印刷版將會停刊，但未知停刊實際日期。而一班TVB周刊員工仍然在無線工作，未收到任何消息。

寶珮如角逐亞太影展最佳女配角：好感恩

第58屆亞太影展將於9月1日喺台北舉行，其入圍名單近日出爐，原來藝人寶珮如憑電影《藍天白雲》有份入圍角逐最佳女配角，她即在社交網留言話好感恩：「感恩可以成為藍天白雲的一份子。」

而其他有份角逐最佳女配角，分別有憑電影《骨妹》嘅廖子妤、《一念無明》嘅金燕玲以及《紅衣小女孩2》嘅台灣女星許瑋甯，唔少網友都話好期待，話好想知道邊個能夠奪獎。

男友起碼等兩年！李佳芯唔諗結婚恨吸金

無線藝人李佳芯（Ali）出席化妝品牌活動，之前有傳Ali與男友陳炳銓將結婚，她否認說：「自從播咗《BB來了》後，啲人就傳我就結婚，仲講到我好似有咗BB咁。（有冇計劃？）我今年忙拍劇，下年都系。（最少等多兩年？）唔可以咁講。（恨唔恨嫁？）我恨多啲錢、多啲嘢做囉，暫時冇諗咁多，我以前都希望28歲結婚，到依家都過咗好多年，唔會再Set目標。」

新劇演平民

對於近期熱播嘅《延禧攻略》，Ali表示有追看：「身邊好多人有睇，我依家睇咗十幾集，以演員身份睇又唔同，會留意佢哋服裝、道具、燈光等等。（對劇中邊個角色最有印象？）女主角纓絡，佢好有觀眾緣，對眼好靚、好識做戲。」其後又表示自己以前亦拍過不少古裝劇，但戲份都不多，而現正忙於拍新劇《殺手》：「但我喺劇入面唔系做殺手，只系做平民，所以唔使打，但就成日被人打。」

唔恨加人工

談及TVB公布業績，問到會否想有人工加？她說：「我人工OK，唔使搵好多，加得多負擔大，唔想有太大壓力，Keep住就好，最重要大家都有份，最好大家加兩日年假。」至於放TVB周刊改為網上版，問會否覺得少咗平台？她表示不會，只是改了另一種形式。問到會否擔心裁員？她說：「如果賺錢又裁員，呢個邏輯唔通，我唔識答。」

被擺上枱！古天樂尷尬見番23年前劇照

影星古天樂（古仔）、張智霖（Chilam）、鄧麗欣（Stephy）、鄭嘉穎、柏天男、謝天華、陳庭欣與黃百鳴等，到銅鑼灣出席新片《L風暴》首映禮，現場先為「八月之星」Chilam及嘉穎送上禮物賀壽，及後更拎出Chilam與古仔在95年劇集《天地男兒》的劇照作對比，相中古仔皮膚依然白皙，他看到相片後有點尷尬，笑指大會整蠱他，而Chilam則說：「影得咁老嘅，當年個樣好似尋日咁喎！」

二人接受訪問，問到古仔見到23年前舊照似不開心？他說：「系錯愕，明明講緊佢哋生日，冇啦啦又拎張相出嚟，被擺上枱。點會唔開心，當然冇關係。」Chilam則笑說：「張相感覺上唔系好耐嚇，當時系我哋仲系童星嘅時候！」提到古仔將為新片變白？他表示：「黑番喇，呢排拍戲曬，有化妝化曬塊面。（同張相一樣白？）差唔多啦！」問Chilam可會想晒黑？他說：「我都鍾意黑，試過曬燈，但出咗好多雀斑，搞到塊面一點點咁。」古仔聞言笑說：「系咪老人斑呀？」問8月27日迎接47歲的Chilam會如何慶祝，他透露人在香港，或會包場睇戲慶祝，問古仔可送禮物給23年老友？他說：「送包場畀佢啦！」問到票房好會如何慶祝？Chilam說：「依家要睇全球票房，若果有三數億，我就裸曬燈！」古仔則說：「咁我著衫曬燈啦！」