有親密相！胡定欣否認撻著小鮮肉治情傷馬明同心穎死唔認愛！

娛樂 07-22

今日快報

驚爆！Linkin Park主音Chester上吊身亡

驚爆！據外媒報道，美國搖滾樂團Linkin Park主音Chester Bennington於加州寓所中上吊身亡，終年41歲。據外媒引述警方消息，Chester Bennington的屍體於當地時間周四早上九時左右被工作人員發現。有指當時大宅只有Chester一人，其太太與仔女並不在家中。

Linkin Park為美國著名搖滾樂團，更被稱為玩Nu Metal風格的最成功樂團，Linkin Park於1996年成軍，主音Chester Bennington便已是主要成員，期間Linkin Park與不同音樂人合作，更兩度獲得格林美獎。最多香港人熟悉的Linkin Park音樂，相信便是主唱的電影《變形金剛》的主題曲《What I"ve Done》。

Chester Bennington與今年5月同樣上吊身亡的美國樂隊Soundgarden兼Audioslave主音Chris Cornell為好友，Chester Bennington在Chris Cornell的葬禮中獻唱悼亡友，而Chester Bennington身亡的日子（7月20日），正正就是Chris Cornell的生忌！

以阿佘做目標！麥明詩處女劇預捱批

麥明詩去年以白紙一張的演戲經驗拍攝處女劇《賭城群英會》，做足心理準備面對批評，還自嘲戲份不多：「唔會污染大家眼球好耐。」首次拍劇最大收穫是能向「師姐」佘詩曼偷師，令她有所啟發。

「十優港姐」麥明詩去年拍攝的處女劇《賭城群英會》正在熱播，新人來說表現合格。麥明詩緊張又期待，望能改進表現，她說：「自己最介意用咗錯嘅演繹方法一路錯落去，拍攝頭幾日好緊張，講句對白好似背書咁，最簡單走位都行錯，有時又遮咗自己塊面，不過都算學得快，好多謝大家嘅包容。自己戲份唔算多，就算做得好乞人憎，都唔會污染大家眼球好耐，唔會成日見到我，大家會舒服啲，哈哈。」

麥明詩認為拍攝《賭》劇最可惜是未能與「師姐」佘詩曼有對手戲，但亦有偷師及攞貼士，她說：「自己好鍾意阿佘嘅《天與地》同《使徒行者》，有問佢有乜貼士，佢第一句就叫我放鬆，同埋融入劇本世界，但放鬆都唔系咁易做到。睇阿佘做戲好自然，平衡得好好，自己可能要幾年時間先掌握到。」麥明詩坦言會以阿佘為目標，希望接拍一部感動人心的作品。

麥明詩首次拍劇就與何浩文有錫錫戲，雖然是蜻蜓點水，但始終都是「第一次」，拍劇期間更傳出緋聞，她說：「自己讀書可以好專註，將專註用番落拍劇，所以拍嗰陣都冇尷尬。」麥明詩又感謝公司及監製王晶起用，她說：「晶哥話覺得我好大膽所以搵我，可能做演員起碼要有膽去試啦。」

有親密相！胡定欣否認撻著小鮮肉治情傷

藝人胡定欣在尖沙咀出席無線新劇《宮心計2深宮計》煞科宴。提到有指她因緋聞男友陳展鵬轉戀單文柔而受情傷，所以在內地開工時與無線小鮮肉施駿喆秒速撻著，更有親密合照為證，她即謂：「唔好誤會，張相系喺慰勞宴影，張相影咗個幾星期，有呢個新聞都幾好笑。（唔系情迷小鮮肉？）唔好亂咁寫，佢系小影迷支持我啫！（有著落未？）等待緊，希望拍完劇休息嚇，識嚇朋友擴闊嚇生活圈子。希望傳媒手下留情，畀我清嚇個File，畀我識嚇朋友，唔識我嘅人會誤會！」

提到《同盟》即將播映，問會否擔心與陳展鵬宣傳時兩人緋聞被重提，她即指屆時大家都會努力去宣傳：「冇啦！希望出到街有好成績！（同佢碰面唔尷尬？）你哋唔講唔問就唔尷尬架喇！（喺橫店見到馬國明同黃心穎好Sweet？）我可唔可以講有？！」有指作為馬國明舊愛的她非常讓步，她表示與對方是好好朋友：「其實唔需要理有關新聞，唔會影響我同佢相處。我都祝福佢有個好女朋友，有個好歸宿，早日成家立室。」

提到「胡說八道會」賣甩她去玩，她笑謂：「好嬲呀！其實系我去咗旅行啫！但佢哋真系趁我開劇開到天昏地暗、趁我唔喺香港就約到齊人，我要自我檢討。」又指29號與「胡說八道會」到澳洲拍攝特輯，屆時更會親自操刀幫大肚杏兒影孕婦寫真：「睇佢有冇準備孕婦Bikini！」更笑指胡蓓蔚打算拎三個篋出發。

死唔認愛！馬明同心穎冇共同Project

藝人馬國明在尖沙咀出席無線新劇《宮心計2深宮計》煞科宴，而其緋聞女友黃心穎則因有工作而缺席。談到他們到橫店開工時朝夕相對，應該非常開心，他即謂：「我系去拍戲唔系去溝女！」記者即指他與心穎食飯時黐住合照，他就：「唔系嘅，個個都有黐。（你同心穎感情突飛猛進？）都系咁啦！（你笑喎！）了解多啲囉，知佢食得辣而我就唔食得辣。」

提到前度胡定欣指馬國明和黃心穎Sweet到爆，他即拉開話題指對方與其他演員收工去按腳亦玩得好「Sweet」。講到定欣亦祝福他早日搵到好女仔，他即謂：「我都祝佢早日搵到好男仔，唔使成日搏殺事業。（幾時到你成家？）冇咁快啦！起碼未去到一齊睇家俬嘅地步！（睇家俬就即繫結婚？）如果一齊睇家俬、睇樓就應該近喇！」

講到心穎最近買樓，記者指馬國明可以趁機陪心穎睇家俬時，他說：「佢自己買樓啫，又唔系同佢共同嘅Project。（你依家同佢有咩共同Project？）依家冇。」提到他不打算陪對方出埠開工，問是否已經對到厭，他妙回謂：「我對我阿媽40年都未厭，啱傾嘅唔會用時間衡量。（咁你幾歲會結婚？）時間到就嚟，但暫時未諗到咁長遠。（你都咁上下年紀！）唔系計年紀，系睇兩個人系咪啱時候。（同心穎傾過？）未研究到呢個問題呀！」

問他們其實是否正式拍拖，他雖然堅稱還是了解中，但不會介意心穎被報道冠以「女友」稱號：「我唔會反駁，但真系仲了解緊！（仲要了解幾耐？）仲要了解好耐！」

相隔10年再出廣東歌　陳曉東孖老婆拍MV

闊別香港樂壇十年的藝人陳曉東（東東）與老婆王妤嫻出席「萬希泉x陳曉東．時間做證陀飛輪暨新歌發布會」。東東對上一次唱廣東歌已是十年前，今次更獲得一眾圈中好友如陳慧琳、邱穎欣、舒淇及張敬軒拍短片支持新歌推出。

在台上東東表示自己不是一個浪漫的人，但幸得老婆包容互相扶持，又形容是一段細水長流的感情。問到是否與老婆首次合作拍攝MV，東東說：「今次唔系，第一次應該系喺3年前一首國語歌，但廣東歌就未試過，今次有手錶產品，所以一齊合作。（一齊搵銀？）唔算。（MV入面冇啲纏綿鏡頭？）費事肉麻親大家吖嘛。（你話你唔浪漫？）其實覺得我感性方面投入喺拍戲唱歌表演入面，可能大個仔咗，自己平時愈嚟愈理性。」