62歲「烈火奶奶」因肺部衰竭今晨離世！

資深演員魯芬在新年期間身體不適突然入院，有指她身上插滿喉，據知是免疫系統出現問題，情況令人擔心。當時魯芬用短訊回覆媒體表示：「多謝，有心。身體健康！」

但今天凌晨，傳出魯芬離世消息，家人發聲明指魯芬因皮肌炎導致肺部衰竭，離世終年62歲（1954年4月7日 - 2017年2月6日）。

聲明全文如下：

「致各位傳媒朋友：

魯芬BB今日凌晨時分因皮肌炎導致肺部衰竭，在家人及朋友陪同下安詳離世，終年63歲。

魯芬BB於十個月前患上皮肌炎，從得知自己患病後，她都一直勇敢面對，對戰勝病魔充滿積極樂觀態度。

感恩各界的愛與關懷，適時公布喪禮安排。

願魯芬BB早往佛國淨土。喃嘸阿彌陀佛！

謝謝！

魯芬摯愛家人字

6/2/2017 」

魯芬原名張偉芬，在灣仔區長大，中學時期是運動方面活躍份子，擅長鉛球及跨欄等運動，更於校運會奪得鉛球金牌。除咗運動之外，唔好睇魯芬外形粗獷，佢亦識得玩中國樂器阮琴。

不過因為魯芬身形魁梧、舉止豪邁、講嘢又粗糙，搞到唔少人都以為佢真系山東人。其實早年魯芬BB曾透露自己出生於上海一個家庭，並由來自山東嘅奶媽湊大，佢笑言被迫飲山東奶媽奶水大，所以體形先至會咁高大。

早前魯芬BB錄影有線飲食節目時，更首次喺幕前大顯身手煮家鄉上海菜，佢表示：「可能奶媽系山東人，飲得佢啲奶多，變咗山東婆咁款！」又感性透露19歲時母親離世，勸吁粉絲珍惜家人。

20幾歲時，魯芬跟契爺董驃入行，起初以玩玩下性質，大部分角色都系要女扮男裝，但係魯芬一啲都唔介意，仲加埋誇張及騎呢造型，令佢演出嘅好多角色都深入民心。

1988年第一部電影《女子監獄》，喺戲入面魯芬飾演蝦蝦霸霸「山東婆」一角，同鄭裕玲互毆場面令人印象深刻，奠定咗魯芬做惡人嘅地位。之後嘅電影好似1991年《整蠱專家》飾演「大白鯊」等，都系以聲大惡霸嘅形象演出。

《女子監獄》

《整蠱專家》

《九品芝麻官》入面嘅「烈火奶奶」就系其中之一，就系憑住呢個角色，魯芬喺內地有唔少登台商演嘅機會。

《九品芝麻官》

魯芬外表魁梧體重有番咁上下，其實佢細個都有愛美之心，十幾歲時曾試食減肥藥，不過最後出現不適情況，所以之後就冇再減肥。雖然魯芬外形出位，不過魯芬亦曾笑言仲有貪靚之心，平時都會用天然嘅護膚品保養皮膚。

2012年曾經有一個網路票選女神活動，魯芬以另類姿態殺入第8位，僅僅排在陳法拉後面。

2015年，魯芬喺網路女神排行榜已經升到第5位，連陳瀅、孫慧雪呢啲知名嘅「女神」都唔系佢對手。魯芬喺訪問中曾表示自己都估唔到：「多謝啲絲打巴打，因為做我呢個位都咁多人錫我，系唔容易！有時啲後生喺街見到我都會話好鍾意我，想同我影張相，我就會話：『得，等你好耐啦！』」

自從魯芬BB得到「女神」稱號之後，佢嘅工作量大增拍咗唔少廣告，其中以和韓國人氣綜藝節目《Running Man》主持之一李光洙合作最為經典。

中韓兩大搞笑能手合作，廣告中多個造型，包括校服、運動服、沙灘服及聖誕服等，李光洙以粵語唱歌兼曬獨有舞技，同扎孖辮嘅烈艷紅唇魯芬相映成趣。短片出街頭三日，就已經有50萬人次瀏覽，絕對系當時熱話。

魯芬無論在拍戲、拍廣告甚至出席活動，每每博到盡，而且只會做多，不會做少，近年的動漫節經常見到她的蹤影，與余慕蓮、黃夏蕙等COSPLAY動漫角色，每次都能帶給大家驚喜，令觀眾拍爛手掌。

2011年魯芬與余慕蓮扮BB出場，震撼全場！從此魯芬名字後面多了兩個英文字BB。她更是扮乜似乜，2012年PSY的《江南Style》舞步大熱，魯芬就扮PSY跳舞出場，無論造型、舞步都似到十足。

2015年夏天，魯芬在中環街頭拍攝電影，全身包到冚兼且要戴假髮，但她仍非常投入，導演準備開機拍攝，魯芬即戴回假髮埋位「扮嘢」，專業精神可嘉，直至導演嗌cut才脫下假髮散熱抖涼。

好友余慕蓮接受電台訪問，提到魯芬今日凌晨因皮肌炎導致肺部衰竭離世，余慕蓮表示前一晚有人以短訊通知她魯芬病危，但不知對方何時離世。她過年前曾與魯芬通電話，因為留意到曾志偉的節目沒有魯芬的蹤影，余慕蓮謂：「當時佢聲音都好清楚，我問點解唔見佢嘅，佢話未好返，希望十五之後再搵我哋。（心情點？）好難過，又少一個老友，冇諗過佢咁早收工。」

說到余慕蓮及魯芬早前於舞台劇《香港過來人》合作，余慕蓮指對方在內地拍攝時染病，但醫了20萬仍未好：「本來佢大頭、擔戲，之後啲對白唯有分畀人講，佢都企唔到，要用柺杖，要坐喺度講對白、講少啲。佢都辛苦，朋友陪住佢。」余慕蓮贊魯芬性格樂觀、高調，像男人一樣做很多工作，除了代理紅酒，又懂做私房菜，早前更拍廣告。余慕蓮稱對方不介意被醜化：「佢冇所謂，做戲嘛，佢鍾意錢，有錢就得。」

導演王晶今天凌晨也在微博發文悼念魯芬表示：「魯芬BB，大家都會懷念你所有的好。」

魯芬BB，一路走好